प्राप्तीचा खरा वांटा

मराठी वाक्संप्रदाय - वाक्यप्रचार

लाभांत निभी वाटणी. गांगा २८९.
दुसर्‍याच्या कमाईत अन्यायानें आपला हिंस्सा ठेवणें. एका कोळयाला एक चांगला मासा सांपडला असतां तो एका सरदाराकडे घेऊन गेला. त्या सरदाराकडे त्या दिवशीं मेजवानी असल्यानें असा मासा हवाच होता व वाटेल ती किंमत देऊन आणावा असें त्यानें नोकरांना बजाविलें होतेंच. तेव्हां दारावरच्या नोकरानें आपल्याला मोबदल्याचा अर्थ वांटा मिळेल तर आपण आंत जाऊं देतों असें अडविल्यावरुन कोळ्यानें कबूल केलें व तो सरदार वाटेल तीं किंमत देण्यास तयार असतांना तो आपणांस फक्त शंभर फटके देण्याचा आग्रह धरुन बसला. त्याप्रमाणें नाइलाजानें सरदारानें त्याला पन्नास फटके लगावल्यावर बाकीचे पन्नास त्याच्या नोकराला देण्याविषयीं त्या कोळ्यानें सांगितलें व सर्व उलगडा केला! अर्थात्‌ कोळ्याच्या हुषांरीबद्दल त्याला बक्षीस मिळालें हें सांगणें नकोच.