आई मुलाची तहान भूक जाणती, त्यापेक्षां मुलाला अधिक माहिती

मराठी वाक्संप्रदाय - वाक्यप्रचार

आईला नेहमी आपले मूल तहानलेले किंवा भुकेले आहे असे वाटते व ती वरचेवर त्यासंबंधी त्यास विचारते किंवा खाण्यापिण्याचा आग्रह करते. पण मुलास खरोखर तशी एकसारखी तहानभूक असणें शक्य नाही व तो खाणेंपिणें नको म्हणतो. तरी आईच्या वेड्या मायेने ते तिला खरे वाटत नाही. मनुष्य मायेने वेडे झाले म्हणजे ते आपल्या प्रिय माणसास केव्हां केव्हां काल्पनिक गोष्टीपासूनहि त्रास होत असेल असे मानते किंवा त्याची वाजवीपेक्षां अधिक जोगवण करण्याचा प्रयत्‍न करते.