तृतीयाः पाद: - सूत्र १५

आत्मशब्दाच्च ॥१५॥

आत्मशब्दाच्च । इतश्च पुरुषप्रतिपत्त्यर्थैवेयमिन्द्रियादिप्रवाहोक्ति: ।
यत्कारणमेष सर्वेषु भूतेषु गूढात्मा न प्रकाशते ।
दृश्यते त्वग्र्यया बुद्धया सूक्ष्मया सूक्ष्यदर्शिभिरिति प्रकृतं पुरुषमात्मेत्याह ।
अतश्चानात्मत्वमितरेषां विवक्षितमिति गम्यते ।
तस्यैव च दुर्विज्ञानतां सुसंस्कृतमतिगम्यतां च दर्शयति ।
तद्विज्ञानायैव च यच्छेद्वाङ्मनसी प्राज्ञ इत्याध्यानं विदधाति ।
तव्द्याख्यातमानुमानि कमप्येकेषामित्यत्र ।
एवमनेकप्रकार आशयातिशय: श्रुते: पुरुषे लक्ष्यते नेतरेषु ।
अपि च सोऽध्वन: पारमाप्नोति तद्विष्णो: परमं पदमित्युक्ते किं तदध्वन:  पारं विष्णो: परमं पदमित्यस्यामाकाङ्क्षायामिन्द्रियाद्यनुक्रमणात्परमपदप्रतिपत्त्यर्थ एवायमायास इत्यवसीयते ॥१५॥