नवग्रहप्रार्थना - आरोग्यं सविता तनोतु जगतां...

आरोग्यं सविता तनोतु जगतां इन्दुर्यशो निर्मलं
भूतिं भूमिसुतः सुधांशुतनयः प्रज्ञां गुरुर्गौरवम् ।
काव्यः कोमलवाग्विलासमतुलं मन्दो मुदं सर्वदा
राहुर्बाहुबलं विरोधिशमनं केतुः कुलस्योन्नतिम् ॥१॥

आदित्यं चन्द्रभौमौ बुधगुरुभृगुजान् भानुजं राहुकेतून्
नत्वा नित्यं त्रिसन्ध्यं जगदुदयलयस्थैर्यसंपत्तिहेतून् ।
ज्योतिश्चक्रेऽश्विताराद्युडुगण सहितान् मेषराश्यादि नेतॄन्
एतेष्वासक्तचित्ताः खचरसुरवरान् भक्तितः प्रार्थयामः ॥२॥