* तिलद्वादशी
हे व्रत षट्‌तिला एकादशीप्रमाणेच आहे. यासाठी माघ. शु. द्वादशीला तिलमिश्रित पाण्याने स्नान करावे. तिळांनी विष्णूपूजन करावे. तिळाच्या तेलाचा दिवा लावाव. तिळाचाच नैवेद्य दाखवावा. तिळाचेच हवन करावे आणि भोजनात तिळाचेच प्रमाण अधिक असावे, यामुळे स्वाभाविक, आगन्तुक, शारीरिक आणि सांसर्गिक सर्व व्याधी दूर होतात व सर्व प्रकारचे सुख लाभते.
* भीमद्वादशी व्रत
हे व्रत माघ शु. द्वादशीलाच असते. या व्रताला ब्रह्मार्पण करून ब्राह्मणांना भोजन द्यावे आणि पारणे करावे. एकादशीप्रमाणेच बाकीचा विधी आहे.
हे व्रत वासुदेवाने प्रथम भीमाला सांगितले, म्हणून त्याला भीमाचे नाव प्राप्त झाले. शु. दशमीला शरीराला तूप लावून स्नान.
'ॐ नमो नारायणाय'
या मंत्राने विष्णुची पूजा. त्याबरोबर गरुड - गणेशाची पूजा. एकादशीला पूर्ण उपवास. द्वादशीला नदीमध्ये स्नान करून घरापुढे मांडव घालावा. एका तोरणाला पाण्याने भरलेले पात्र टांगावे. त्या पात्राच्या तळाला एक छिद्र पाडावे. त्यातून झिरपणारे थेंब मस्तकावर घ्यावे. नंतर ऋग्वेदी पुरोहिताकडून होम, यजुर्वेदी पुरोहिताकडून रुद्रावर्तन आणि सामवेदी पुरोहिताकडून सामगायन करवावे. पुरोहितांना वस्त्रालंकार देऊन त्यांच सन्मान करावा. हे व्रत करणारा पापमुक्‍त होतो. या व्रताचे माहात्म्य वाजपेय आणि अतिरात्र या यागापेक्षाही मोठे आहे, असे सांगितले आहे.
फल - विष्णुलोकप्राप्ती.
* वराह द्वादशी
एक तिथिव्रत. माघ शु. द्वादशीला हे व्रत करावयाचे असते. विष्णूचा अवतार वराह ही या व्रताची देवता आहे. या व्रताचा विधी - एकादशीला व्रतसंकल्प व पूजा करावी. एका पात्रात सुवर्णाची, चांदीची किंवा तांब्याची नाणी व सर्व प्रकारची धान्यबीजे घालून त्यावर वराहाची सोन्याची मूर्ती ठेवावी आणि तिची पूजा करावी. रात्री जागर करावा. द्वादशीला पूजेतील वराहाची मुरी ब्राह्मणाला द्यावी.
फल - सौभाग्य, संपत्ती, सौंदर्य, पुत्र यांची प्राप्ती.