श्रीगणेशाय नम: ॥
श्रीकेशवाच्युत मुकुन्द रथांगपाणे गोविन्द माधव जनार्दन दानवारे ।
नारायणामरपते त्रिजगन्निवास जिह्वे
जपेति सततं मधुराक्षराणि ॥ १ ॥
श्रीदेवदेव मधुसूदन शार्ङ्गपाणे दामोदरार्णवनिकेतन कैटभारे ।
विश्वंभराभरणभूषित भूमिपाल जिह्वे ० ॥ २ ॥
श्रीपद्मलोचन गदाधर पद्मनाभ पद्मेश पद्मपद पावन पद्मपाणे ।
पीतांबरांबररुचे रुचिरावतार जिह्वे ० ॥ ३ ॥
श्रीकांत कौस्तुभधरार्तिहराब्जपाणे विष्णो त्रिविक्रममहीधर धर्मसेतो ।
वैकुण्ठवास वसुधाधिप वासुदेव जिह्वे ० ॥ ४ ॥
श्रीनारसिंह नरकांतक कांतमूर्ते लक्ष्मीपते गरुडवाहन शेषशायिन् ।
केशिप्रणाशन सुकेश किरीटमौले जिह्वे ० ॥ ५ ॥
श्रीवत्सलाञ्छन सुरर्षभ शंखपाणे कल्पांतवारिधिविहार हरे मुरारे ।
यज्ञेश यज्ञमय यज्ञभुगादिदेव जिह्वे ० ॥ ६ ॥
श्रीराम रावणरिपो रघुवंशकेतो सीतापते दशरथात्मज राजसिंह ।
सुग्रीवमित्र मृगवेधन चापपाणे जिह्वे ० ॥ ७ ॥
श्रीकृष्ण वृष्णिवर यादव राधिकेश गोवर्द्धनोद्धरण कंसविनाश शौरे ।
गोपाल वेणुधर पांडुसुतैकबंधो जिह्वे ० ॥ ८ ॥
इत्यष्टकं भगवत: सततं नरो यो नामाङ्कितं पठति नित्यमनन्यचेता: ।
विष्णो: परं पदमुपैति पुनर्न जातु मातु: पयोधररसं पिबतीह सत्यम् ॥ ९ ॥
इति श्रीपरमहंसस्वामि ब्रह्मानंदविरचितं श्रीहरिनामाष्टकं सम्पूर्णम्‌