श्रीगणेशाय नम: ॥ नारद उवाच । पुनर्दैत्यं समायान्तं दृष्ट्‍वा देवा: सवासवा: ॥ भयप्रकंपिता सर्वे विष्णुंस्तोतुं प्रचक्रमु: ॥ १ ॥
देवा ऊचु: ॥ नमो मत्स्यकुर्मादिनानास्वरूपै: सदा भक्‍तकार्योद्यतायार्तिहत्रे । विधात्रादिसर्गस्थितिध्वंसकर्त्रे गदाशंखपद्मारिहस्ताय तेऽस्तु ॥ २ ॥
रमावल्लभायासुराणां निहंत्रे भुजंगारियानाय पीतांबराय । मखादिक्रियापाककर्त्रे विकत्रे शरण्याय तस्मै नत: स्मो नता स्म: ॥ ३ ॥
नमो दैत्यसंतापितामर्त्यदु:खाचलध्वंसदंभोलये विष्णवे ते । भुजंगेशतल्पे शयायार्कचन्द्रद्विनेत्राय तस्मै नता: स्मो नता:स्म ॥ ४ ॥
नारद उवाच ॥ संकष्त नाशनं नाम स्तोत्रमेतत्पठेन्नर: । सकदाचिन्न संकष्टै: पीड्यते कृपया हरे: ॥ ५ ॥
इति श्री पद्मपुराणे सुरनारद संवादे संकष्टनाशनं नाम विष्णुस्तोत्रं सम्पूर्णम् ॥