एकतारी पदे - पद ८

(चाल-लावणी रिवाज)

(कांगे सुंदरी माझ्यावरती)

भाद्रपदीं हे क्षुध्द चतुर्थी उत्सव हा करिती । घरोघरीं गणरायाची मूर्ति आणुनी पुजिती ॥१॥
गणरायाचें स्वरुप चांगलें दिसतें सुंदर । गळा मोत्याचे हार शोभती कानी कुंडले ॥२॥
मुगुट मस्तकी कैसा ब्रह्म्याने रत्नखचितची हिरे बसविले वेष्टण पिच्छांचे ॥३॥
नेसावयाला पिवळा पितांबर शालुच पांघरले । पायी पैंजण नेपुरें वाजती शोभतसे सुंदर ॥४॥
बसावयाला उंदीर वाहन जातसे कैलासी । ब्रह्मा विष्णु हे सदाशिवादि वंदन ते करिती ॥५॥
इंद्र चंद्र हे भजती त्यातें सप्त ऋषी नमिती । स्वर्ग मृत्यु पाताळाचे लोक भावें ते भजती ॥६॥
ऐसे ते महाराज भजा तुम्ही त्यातें । कार्य सकळ बा तुमचें करतील धर्मशास्त्र बोले ॥७॥
धर्मशास्त्र हे वाचुनि पहावे केले ब्रह्माने । भारत भागवत उकलून पहावें लिहिलें व्यासानें ॥८॥
कलियुगामध्यें देव गजानन चंडी माता ही । इच्छा तुमची पूर्ण करिल बा खरोखरी आतां ॥९॥
एवढयासाठी भजा तुम्ही या श्री गणपतिराया । संकट व्यथाही दूर करिल बा भजा तुम्ही त्याते ॥१०॥
याही पदाचा कर्ता दूर रामजी तुळसीमापारा । रचना केली महाड गांवी नमनचि गणपतीला ॥११॥