अगस्त्याष्टकम् - अद्य मे सफलं जन्म चाद्य म...

अद्य मे सफलं जन्म चाद्य मे सफलं तपः । अद्य मे सफलं ज्ञानं शम्भो त्वत्पाददर्शनात् ॥१॥
कृतार्थोऽहं कृतार्थोऽहं कृतार्थोऽहं महेश्वर । अद्य ते पादपद्मस्य दर्शनात्भक्तवत्सल ॥२॥
शिवश्शम्भुः शिवश्शंभुः शिवश्शंभुः शिवश्शिवः । इति व्याहरतो नित्यं दिनान्यायान्तु यान्तु मे ॥३॥
शिवे भक्तिश्शिवे भक्तिश्शिवे भक्तिर्भवेभवे । सदा भूयात् सदा भूयात्सदा भूयात्सुनिश्चला ॥४॥
आजन्म मरणं यस्य महादेवान्यदैवतम् । माजनिष्यत मद्वंशे जातो वा द्राग्विपद्यताम् ॥५॥
जातस्य जायमानस्य गर्भस्थस्याऽपि देहिनः । माभून्मम कुले जन्म यस्य शम्भुर्न-दैवतम् ॥६॥
वयं धन्या वयं धन्या वयं धन्या जगत्त्रये । आदिदेवो महादेवो यदस्मत्कुलदैवतम् ॥७॥
हर शंभो महादेव विश्वेशामरवल्लभ । शिवशङ्कर सर्वात्मन्नीलकण्ठ नमोऽस्तु ते ॥८॥
अगस्त्याष्टकमेतत्तु यः पठेच्छिवसन्निधौ । शिवलोकमवाप्नोति शिवेन सह मोदते ॥९॥
॥इत्यगस्त्याष्टकम् ॥