श्रीवातपुरनाथाष्टकम् - कुन्दसुम बृन्दसममन्दहसिता...

कुन्दसुम बृन्दसममन्दहसितास्यं नन्दकुलनन्द भर तुन्दलनकन्दम् ।
पूतनिजगीतलवधूत दुरितं तम् वातपुरनाथमिममातनु हृदब्जे ॥१॥
नीलतर जालधर भालहरि रम्यं लोलतर शीलयुत बालजनलीलम् ।
जालनति शीलमपि पालयितुकामं वातपुरनाथमिममातनु हृदब्जे ॥२॥
कंसरणहिंसमिह संसरणजातक्लान्तिभरशान्तिकर कान्ति झरवीरम् ।
वातमुख धातुजनि पातभयघातं वातपुरनाथमिममातनु हृदब्जे ॥३॥
जातु धुरि पातुकमिहातुरजनं द्राक् शोक भरमूकमपि तोकमिव पान्तम् ।
भृङ्गरुचिसंगरकृदङ्गलतिकं तं वातपुरनाथमिममातनु हृदब्जे ॥४॥
पापभवतापभरकोपशमनार्त्थाश्वासकर भासमृदुहासरुचिरास्यम् ।
रोगचय भोगभय वेगहरमेकं वातपुरनाथमिममातनु हृदब्जे ॥५॥
घोषकुल दोषहर वेषमुपयान्तं पूषशत भूषक विभूषण गणाढ्यम् ।
भुक्तिमपि मुक्तिमपि भक्तिषु ददानं वातपुरनाथमिममातनु हृदब्जे ॥६॥
पापक दुरापमतिचापहर शोभस्वापघनमापतदुमापति समेतम् ।
दीनतर दीनसुखदानकृत दीक्षं वातपुरनाथमिममातनु हृदब्जे ॥७॥
पादपतदादरण मोदपरिपूर्णं जीवमुख देवजन सेवनफलाङ्घ्रिम् ।
रूक्ष भव मोक्षकृत दीक्ष जनवीक्षं वातपुरनाथमिममातनु हृदब्जे ॥८॥