पंचम पटल - स्वाधिष्ठानचक्रविवरणम्

द्वितीयन्तु सरोजञ्च लिंगमूले व्यवस्थितम् ।
बादिलान्तं च षङ्वर्ण परिभास्वरषङ्दलम् ॥९८॥

स्वाधिष्ठानाभिधं तत्तु पङ्कजं शोणरूपकम् ।
बाणाख्यो यत्र सिद्धोsस्ति देवो यत्रास्ति राकिणी ॥९९॥

यो ध्यायति सदा दिव्यं स्वाधिष्ठानारविन्दकम् ।
तस्य  कामाङ्गना: सर्वा भजन्ते काममोहिता: ॥१००॥

विविधं चाश्रुतं शास्त्रं नि:शंको वै भवेद् ध्रुवम् ।
सर्वरोगविनिर्मुक्तो लोके चरति निर्भय: ॥१०१॥

मरणं खाद्यते तेन स केनापि न खाद्यते ।
तस्य स्यात्परमा सिद्धिरणिमादिगुणप्रदा ॥१०२॥

वायु: सञ्चरते देहे रसवृद्धिर्भवेद्ध्रुवम् ।
आकाशपङ्कजगलत्पीयूषमपि वर्द्धते ॥१०३॥