अथ स्थापितदेवतानां होमः

एवं प्रधानहोमं समाप्यान्तिमदिने तद्दशांशेन तर्पणं तर्पणदशांशेन मार्जनञ्च कृत्वा प्रधानदेवताया भगवत्याः श्रीगायत्रीदेव्या अङ्गदेवतात्वेन स्थापितानां वास्त्वादिक्षेत्रपालदेवतान्तानां तथा च सर्वतोभद्रमण्डलदेवतासहितश्रीगायत्रीपीठदेवतानां गायत्रीयन्त्रदेवतानाञ्च स्थापनक्रमेण प्रतिदैवतमेकैकाम् आज्याहुतिं दद्यात् । यजमानो हस्ते जलं गृहीत्वा । मया प्रारब्धस्य सग्रहमखश्रीगायत्रीपुरश्चरणकर्मणः साङ्गतासिद्ध्यर्थं भगवत्याः श्रीगायत्रीदेव्या अङ्गत्वेन वास्त्वादिस्थापितदेवतानां तथा च सर्वतोभद्रमण्डलदेवतासहितगायत्रीपीठदेवतानां यन्त्रदेवतानां च स्थापनक्रमेण प्रत्येकमेकैकयाऽऽज्याहुत्या यक्ष्ये ॥