ईळ जाई कामाखाले रातीं झोप नाहीं आली
अग माझे मायबाई तुझी मला सय झाली
सासर ग वासिनीला रात खरी मायबहिन
असा कोंबडा दुस्मान बांग टाकी टवकारुन
*
भर्ताराचा राग जसा पेटारीचा नाग
अग माझे मंगूबाई त्याच्या मरजीनं वाग
अग भर्ताराचा राग घेईना ग गंध पानी
अग माझे सईबाई घाल पिरतीची मव्हनी
भर्ताराचा राग जसा इस्त्याचा इंगूळ
बाई नेनंते ग माझे त्याची मरजी सांभाळ
भर्ताराचा राग दुधावरली उकळी
नेनंते ग बाई माझे नको होऊं उतावळी
*
सासु सासर्‍याचं येऊं देऊंने गार्‍हानं
अग माझे मंगूबाई लेकी नांदावं भारानं
नंदा जावांच बोलनं जसे सराटयाचे येल
अग माझे सईबाई सखे तुडवीत चाल
*
जाईना ग ऊभ्या रस्त्या दिसूं देईना पासवा
मायबाई हरनीचा आहे पवित्र कूसवा
जाईना ग उभ्या रस्त्या पाहीना ग कूनाकडे
मायबाई देसायाला समुद्राला पानी चढे
पराया ग पुरुषाला बोलूं ने ग येकायेकी
अग माझे सईबाई अपुन अशीलाच्या लेकी
पराया ग पुरुषाला माघूने ग कात चूना
नेनंते ग सईबाई आपुन अशीलाच्या सूना
इरुद्या ग जोडव्याचा पाय टाकावा जपून
हे ग माझे सईबाई लेकी भल्याच्या आपुन
*
शेजी आली घरा बस म्हणतें ग तीला
मायबाईच्या ग माझ्या हरनीचा शीक मला
*
पराया ग परदेशी आपलं ग नाहीं कोनी
अग माझे सखे बाई शेजी कर माय बहिनी
*
मांडीचा ग पाळणा डोळ्याचा ग केला दीवा
मायबाईचा ग माझ्या उपकार फेडूं कव्हां
नऊ महीने ग वझं असं वागविलं माझं
हरन ग मायबाई गंगाबाई नांव साजं
नव महीने ग वझं माझं वागविलं कुशी
मायबाई हरनीला फिरुनी ग बोलूं कशी
समुद्र ग सोखील्यानं जाईना ग माझी तहान
अशी माझी मायबाई गंगा भरली आसमान
*
बापाचा ग उपकार काशी गेल्यानं ग फीटे
मायाबाईचे ग मह्या हरनीचे कष्‍ट मोठे
देसाई ग राया माझे काशी खंडीचे ग ऋषी
माय हरण माझी विष्णुपदाची तुळशी
*
देसाई ग राया माझा काशी खंडीचा ग वड
हरन ग मायबाई त्रिवेनीचं पानी गोड
देसाई ग राया वड मायबाई ग गोंदन
काशीची ग वाट जाती दोन्ही झाडांच्या मधून
*
प्रपंच करुनी परमार्थ केले दोन्ही
असे माझे माय-बाप मोक्षाचे झाले धनी
*
दळन ग कांडनाला आहे बाह्या बळ माझं
हरन ग मायबाई वाघिनी ग दूध तुझं
दळन ग कांडनाला बाह्याला ग माझ्या बळ
मायबाईनं घातलं घुटीमधें जायफळ
थोरलं ग माझं जातं म्यां ग वढून पाहीलं
मायबाई हरनीचं दूध कारनी लागलं
दळना ग परीस दे ग निघळन भारी
मायबाईच्या दुधाची झडती ग द्येते नारी
*
थोरल्या ग जात्याला नार झाली ग घाबरी
मायबाईच्या दुधाच्या पेलें मधाच्या घागरी
*
बारा वर्सं तप तप केलं रे बामना
बाळ नेनंती ग माझी कन्यादानीं देवंगना
सावळ्या ग जावयानं दिवसा ग चोरी केली
बाळ नेनंती ग माझी माळ पुतळ्याची नेली
सावळा ग जांवाई सोन्याचं ग इंद्रावन
बाळ नेनंती ग माझी देली तुळस लावून
*
हात जोडून ईनंती यीहिनीबाई कागदांत
बाळ अन्हाड ग माझी सई घ्यावी पदरांत
हात जोडून ईनंती यीहिनीबाई ग गडनी
बाळ नेनंती ग माझी देलं काळीज तोडूनी
हात जोडून ईनंती हे ग यीहिनीबाई तूझी
अशी अन्हाड म्हनूनी हरन सांभाळावी माझी
*
सासर्‍या ग सासरवास नग करुं यीहिनीबाई
बाळ नेनंती ग माझी अन्यवा ग जोगी नाहीं
*
हात जोडुन ईनंती याह्या परीस यीहीनीची
सखे बाईची ग माझ्या भूक जानावी तान्हीची
हात जोडुन ईनंती यीहिनीबाई तूं ग गंगा
बाळ बेनंतीला माझ्या जेऊं घालून काम सांगा
हात जोडुन ईनंती यीहिनी बाई तूं ग साळू
अन्हाड ग बाळ माझी नवीनाचं काम हळूं
*
लेक सासर्‍याला जाती डोळ्याला ग येती गंगा
नेनंत्या ग मयनाला महिन्याची बोली सांगा
लेक सासर्‍याला जाती वाईट ग नको मानू
नेनंती ग बाई माझी आठा दिसा तुला आनू
*
अशी सांगून धाडीतें आल्या गेल्या हातीं तुला
भाई राजसानं माझ्या पंचमीला न्यावं मला
दिवाळी ग दसरा माझ्या जिवाला आसरा
भाईराजस ग माझा मूळ नीघतो उशीरा
*
वाटच्या वाटसरा काय पाहाशी शेताला
भाईरायाच्या रे माझ्या ढवळेनंदी आऊताला
पान्या पावसाचं आभाळ ग आलं मोडी
सावळा ग भाऊराय तिपनीचे नंदी सोडी
अरे तुझ्या जीवासाठीं आभाळांत व्हईन घार
भाईराजसा रे माझ्या छाया करीन तुजवर
गांवाला ग गेलीयाची म्यां ग चिंता न्हाई केली
भाईरायाच्या ग माझा सोबतीला अंबा गेली
कचेरीचं बलावनं मागं पुढं ग मानूस
असा माझा भाईराय मधे मोत्याचं कनीस
*
माझं रे आयुक्ष कमी करावं पुरतं
भाई सावळ्याला माझ्या घाल शंभरावरतं
*
भाईरायाच्या ग घरीं आज सटीचं मेहून
देवा मल्हारी रे राया यावं म्हाळसा घेऊन
नऊ दीस नवरात्र भाईरायाच्या ग घरीं
दयाळू ग अंबामाय फुलाच्या ग शेजवरी
अंबामाय माऊलीचं आसन ग रुंदावलं
भाईरायाला ग माझ्या भगताला भाग्य आलं
लक्षुमी ग बाई आली तांब्याभर ताक पेली
भाई सावळ्याला माझ्या जल्माची भाक देली
सुखी राख देवा माझ्या कुळाचा दीपक
सये माझा भाईराज बहेनीला भाऊ येक
*
दिवाळीच्या दिशीं ववाळीतें बापाला
सई नेनंती ग माझी मोतीं माघती कापाला
हे ग दिवाळीचे दिशी तबकीं ग पांच केळ
अग माझे मायबाई ववाळीतें तुझं बाळ
*
चोळी ही ग फाटली ठिगळ लावीना बाहीला
बहेना ग बाई माझी आऊक्ष माघती भावाला
माझ्या चुडीयाचा ठसा इथं कोनाला येनार
आतां माझा भाईराज भाऊबीज करनार
काळी ही ग चंद्रकळा कांठाला ग तीन बोटं
भाईरायाचं ग माझ्या घेनार्‍याचं मन मोठं
पाठीवरला ग भाऊ लई मायाळू दिसतो
अ सये दुकानांत खन अंजिरी पूसतो
*
दसर्‍या पासूनी दिवाळी ग ईस रोज
नेनंती ग बाई माझी वाट पहातां नीज
*
मुर्‍हाळ्या रे मूळ जाशी घोड बांध शेवंतीला
सखेबाईला ग माझ्या आधीं भेट नेनंतीला
मुर्‍हाळ्या रे मूळ जाशी खून सांगेत दूसरी
सखेबाईची ग माझ्या मैना खेळती वसरी
*
नेनंत्या ग मुर्‍हाळ्याची हौस माझ्या ग मनाला
भाच्या माझ्या नेनंत्याचा हात पुरना जीनाला
*
दिवाळीची चोळी व्हइल जात्याचं झाडनं
भाईंराजस रे माझा द्यावा डागीना धाडून
*
पाटाऊ रे पइठनी आहे माझं रे नेसनं
परी माझ्या भाईराया तुझ्या चोळीचं भूषनं
शेजी पुसत्यात चोळीला ग काय देलं
भाईराजसाला माझ्या दिवाळीला ववाळीलं
दिवाळीच्या दिशीं तबकीं ग चंद्रहार
भाईराजस ग माझा ववाळीला सावकार
*
दिवाळीची चोळी संक्रांतीला तीळ-लाडू
भाई राजसा रे माझ्या नको माझी आस मोडूं
*
अशी चंदनाची उटी बाळा तुला कुठं झाली
सखेबाईनं ग माझ्या बहिनीनं बीज केली
दिवाळी ग दसरा आपल्या ग घरीं केला
सये माझा भाईराय बीजला म्यां बलावीला
*
बहेनीचं घेतो कडे आपलं ग धरीं हाती
भाईराजस ग माझा मनधरनीचा किती
*
मामा मांडीतसे पाट मामी काढीती रांगोळी
अरे माझ्या तान्ह्या बाळा तुझं कवतिक आजोळीं
*
भाऊ ग आपूला भावजय ग पराई
अग माझे सये बाई मनधरनी करावी
भाईराज ग म्हनीतो बहेनीला कर भात
भावजय ग बोलली साळी पडल्या पेवांत
हे ग भाऊ म्हनीतो बहेनीला वाढ दही
भावजय ग म्हनीती दूध ईरजलं नाहीं
हे ग भाऊ म्हनी बहेनीला वाढ तूप
भावजय ग बोलली गवळ्यांनी नेलं माप
भाऊ चोळी शीवी भावजय ग रागांत
भाईराजस ग माझा शिंपी बलावी बागांत
*
अभंडया नारीनं सये कुभांड रचीलं
भाईरायाचं ग माझ्या मन सख्याचं मोडीलं
*
लेकीचा जलम घालूं नग देवराया
मायबाई हरानीचे केले कष्‍ट गेले वाया
लेकीचा जलम परघरची ग धन
भाईराजस ग माझा चंद्र वाडयाला राखन
लेकीचा जलम नग घालूं देवराया
लेक देऊन पडा पाया केले कष्‍ट सर्वे वाया