अंगुष्ठप्रमाण राजपत्र चिठी । वारंवार लेहिलें ।
अर्धपठी सहजी समाधी परेतठी । योगिया लाभे ॥२६॥
टीकाः
योगियांचे योगिराज परमसिद्ध ज्ञानराज । राजपत्र चिठी सहज । लिहित जाले ॥१॥
स्वानंदसाम्राज्यचक्रवर्ती । जावेलु ज्ञानेश्वर निगुती । अंगुष्ठाप्रमाण जयाप्रति । सनद मिळाली ॥२॥
भुकेलिया भूक खादली । तहानेलिया तहानाचि प्याली अहोरात्र वारिया खेळी । ज्ञानाई ते ॥३॥
म्हणोनि जाली सहजसिद्धि । टाळी लागली ब्रह्मानंदी । परेतठीं सहज समाधि । योगियाची ॥४॥
अर्धपठी सनद जाली । तेणें विश्वासी केली साऊली । ऐसी ज्ञानेश्वर माऊली । विश्वाचिये ॥५॥
ज्यांची सरली उपाधी । ऐसी अखंड सहज समाधि । जयाकॄपें मोक्षपदीं । भक्त बैसे ॥६॥
सहस्त्रदळीं सोहं रुप । तयांत जे ॐ स्वरुप । तेथ अंगुष्ठमात्र प्रदिप । रारयंत्री ॥७॥
पंचमातृकेचे पैल । आणि अर्धमात्रेचे ऐल । सोहंदीप अति तेजाळ । अंगुष्ठमात्र ॥८॥
तेचि दिधली सनद । जेथ पुर्ण ब्रह्मानंद । ऐसे सदगुरु अगाध । निवृत्तीनाथ ॥९॥