देवीची आरती - जय देवी विष्णुकांते ...

जय देवी विष्णुकांते । महालक्ष्मी ग माते ।
आरती ओंवाळीन तुज विज्ञानसरिते ॥ जय. ॥ धृ. ॥
मर्दिला कोल्हासुर । ख्याती केली की थोर ॥
श्रीलक्ष्मी नाम तुझें ।दैत्य कांपती फार ॥ जय. ॥ १ ॥
धन्य तेथीचे नर । सकळही मुक्त होती ॥
तुजला पहातां सत्वर ॥ जय. ॥ २ ॥
रहिवास कोल्हापूरी । पंचगंगेच्या तीरी ॥
सुविशाळ सिंहासन ।विराजसी तयावरी ॥ जय. ॥ ३ ॥
मागणें हेंचि माये ।आतां दाखवी पाये ॥
उशीर नको लावू ।दास तुझा वाट पाहे ॥ जय. ॥ ४ ॥