कृष्णजयंती - देवाची विष्णूस प्रार्थना

सकळांनी स्तुति तेव्हा आरंभिली । दया येवो भली आमुची की ॥१॥
सनातन धर्म दैत्ये बुडवीला । अनर्थ जाहला धरित्रीसी ॥२॥
गाईंची कत्तल ब्राह्मणांचा छळ । करिती प्रबळ दैत्येश्वर ॥३॥
वेदमार्ग नाम-शेष त्यांही केला । धर्म बुडविला पायांतळी ॥४॥
पाखंडाचा केला त्यानी पुरस्कार । साधु-तिरस्कार करिताती ॥५॥
वैष्णव धर्म सारा नष्ट प्राय झाला । आतां प्रबुद्धतेला धरा नाथा ॥६॥
रसातळासींही पृथिवी चालली । पाहिजे सोडविली भगवंता ॥७॥
तैसेच करी आतां अवतार घेई । धांवोनिया येई तारावया ॥८॥
विनायक म्हणे जागे झाले हरी । वाणी अशरीरी उद्भवली ॥९॥