बालगीत - गोरी पान फुलासारखी छान...

गोरी पान फुलासारखी छान
दादा मला एक वहिनी आण

वहिनीला आणायला चांदोबाची गाडी
चांदोबाच्या गाडीला हरिणाची जोडी
हरिणाची गाडी तुडवी गुलाबाचे रान
दादा मला एक वहिनी आण

गोर्‍या गोर्‍या वहिनीची अंधाराची साडी
अंधाराच्या साडीला चांदण्याची खडी
चांदण्याच्या पदराला बिजलीचा बान
दादा मला एक वहिनी आण

वहिनीशी गट्टी होता तुला दोन थापा
तुला दोन थापा तिला साखरेचा पापा
बाहुल्यांच्या परी होऊ दोघी आम्ही सान
दादा मला एक वहिनी आण