श्रीकृष्ण माधुरी - पद ८६ से ९०

८६.
आवत मोहन धेनु चराए।
मोर मुकुट सिर, उर बनमाला,
हाथ लकुट, गो रज लपटाए ॥१॥
कटि कछनी किंकिनि धुनि बाजति,
चरन चलत नूपुर रव लाए ।
ग्वाल मंडली मध्य स्याम घन,
पीत बसन दामिनी लजाए ॥२॥
गोप सखा आवत गुन गावत,
मध्य स्याम हलधर छबि छाए।
सूरदास प्रभु असुर सँघारे
ब्रज आवत मन हरष बढाए ॥३॥

८७.
राग कल्यान
ए लखि आवत मोहनलाल।
स्याम सुभग घन, तडित बसन, बग पंगति, मुक्ता माल ॥१॥
गो पद रज मुख पै छबि लागति, कुंडल नैन बिसाल।
बल मोहन बन तैं बने आवत, लीन्हे गैया जाल ॥२॥
ग्वाल मंडली मध्य बिराजत, बाजत बेनु रसाल।
सूर स्याम बन तैं आए, जननि लए अंकमाल ॥३॥

८८.
राग कान्हरौ
हम दोनो इहि भाँति कन्हाई।
सीस सिखंड, अलक बिथुरी मुख, कुंडल स्त्रवन सुहाई ॥१॥
कुटिल भृकुटि, लोचन अनियारे, सुभग नासिका राजत।
अरुन अधर दसनावलि की दुति दाडिम कन तन लाजत ॥२॥
ग्रीव हार मुकुता, बनमाला, बाहु दंड जग सुंड।
रोमावली सुभग बग पंगति, जाति नाभि हृद झुंड ॥३॥
कटि पट पीत, मेखला कंचन, सुभग जंघ, जुग जानु।
चरन कमल नख चंद्र नही सम, ऐसे सूर सुजानु ॥४॥

८९.
राग बिलावल
बने बिसाल कमल दल नैन।
ताहू मैं अति चारु बिलोकनि,
गूढ भाव सूचति सखि सैन ॥१॥
बदन सरोज निकट कुंचित कच,
मनौ मधुप आए मधु लैन।
तिलक तरुन ससि, कहत कछुक हँसि,
बोलत मधुर मनोहर बैन ॥२॥
मदन नृपति कौ देस महा मद,
बुधि बल बसि न सकत उर चैन।
सूरदास प्रभु दूत दिनहिं दिन,
पठवत चरित चुनौती दैन ॥३॥

९०.
राग धनाश्री
ऐसे हम देखे नँद नंदन ।
स्याम सुभग तनु पीत बसन, जनु
नील जलद पै तडित सुछंदन ॥१॥
मंद मंद मुरली रव गरजनि,
सुधा दृष्टि बरषति आनंदन।
बिबिध सुमन बनमाला उर, मनु
सुरपति धनुष नए हो छंदन ॥२॥
मुक्तावली मनौ बग पंगति,
सुभग अंग चरचित छबि चंदन।
सूरदास प्रभु नीप तरोवर
तर ठाढे सुर नर मुनि बंदन ॥३॥