पद ४१
चाल -जन्ममरण चक्रावर
आत्मप्राप्तीवांचुनि प्राण्या धर्म म्हणूं नये ॥
अनूभवावांचुनि जीवा कर्म करणे नोहे ॥धृ०॥
भौतिक म्हणती जीवा कर्म , हेंचि करणे आहे ॥
राजकीय प्राप्त करुनि घेणे हाचि धर्म आहे ॥१॥
राज नष्ट क्रीया नष्ट फल नष्ट होय ॥
कीर्ती कोठे राहे शाश्वत , कोठे बैसुनि पाहे ॥२॥
अर्जुनासी कर्म लाविले , काय शिल्लक आहे ॥
नातू पणतू खाती म्हणती , त्यांचे कोण आहे ॥३॥
शमदमादि साधन करिती , परमात्मप्राप्ती ऐसी ॥
त्याचे फल कीती कैसे , मुंगी नाशिवंत ऐसे ॥४॥
बलभीम बाळ बोले ऐसे , नादी लागुं नये ॥
भागिरथी -दष्टी घेउनि , निजानंदी राहे ॥५॥
अभंग ४२
सकळांसी माझी हेचि विनवणी ॥
अनुभव जनी थोडा बोला ॥१॥
एक हात लाकूड , नऊ हात ढलपी ॥
ऐसी ही ख्याती करुं नका ॥२॥
शब्दज्ञानमीषे करुनीया ख्याती ॥
येईल तो हाती ज्ञानगर्व ॥३॥
गाऊनी दावीती परेहूनी पर ॥
नसे ती करणी तीळमात्र ॥४॥
इंद्रियदमन सांगे लोकांप्रति ॥
स्वये आंगी नाही वैराग्य ते ॥५॥
भागीरथी सर्व भक्तांसी प्रार्थीते ॥
सद्गुरुचरण स्मर सदा ॥६॥
पद ४३
चाल -अहो या मालूच०
अहो या गुरुला शरण जाऊं ।
निजबोध घेऊनि येऊं ॥धृ०॥
तनमनधन हे अर्पण करुनी ।
निजस्वरुप पाहुनि घेऊं ॥१॥
जागृति स्वप्न सुषुप्ति नाही ।
तुर्या होऊनि आपण राहूं ॥२॥
विराट हिरण्यगर्भ माया त्यजुनी ।
ईश्वर होउनि राहूं ॥३॥
स्थूल सूक्ष्म कारण आनंद ।
गुरुपदिं जाउनि वाहूं ॥४॥
स्थूल सूक्ष्म जाणिव नेणीव ।
निश्चल पदिं मिळवुनि राहूं ॥५॥
बलभिमचरणी भागिरथीही ।
आनंदि रंगुनि राहूं ॥६॥
अभंग ४४
चारी देहावेगळी झाली । वाचा आतां नाही उरली ॥१॥
उन्मनीत क्रिया चालली । भक्तिभावे आदरली ॥२॥
सेवा सद्गुरुची उरली । अन्य देवा न पाहे मी ॥३॥
पाहिन ब्रह्मरुप सर्व । यांत मिळे सर्व वर्म ॥४॥
बलभीमवचन विवरद्वार । त्यांत भागिरथि राहे स्थिर ॥५॥
पद ४५
चाल -मनरंजनि बालक०
अहो प्रभो अगाध किति तव करिणी ॥धृ०॥
जग नग सारे दिसती मजला ।
भासे शुक्ति रुप्याचे परी ॥१॥
ज्ञानामृत मज पाजुनि निरंतर ।
घोटविले हृदयांतरी ॥२॥
बोधवाटी लावूनि कानी ।
मन हे लाळचि घोटी ॥३॥
सद्गुरु माझे बलभिमराया ।
देऊनि आपुली निजदृष्टि ॥४॥
भागिरथीहि असतां चंचळ ।
नीजविली निश्चळ पदी ॥५॥
अभंग ४६
आम्ही झालो ब्रह्मरुप । नाहिं आम्हांसी साक्षोप ॥१॥
साक्षोप पाहूं जातां । आक्षोप वाटे चित्ता ॥२॥
नाहिं संदेहाचा लेश । निर्भय झालो खास ॥३॥
जड चैतन्याची गांठ । सोडूनि झालो धीट ॥४॥
कर्म धर्म दोन्ही नाही । निःशंक होऊनि पाही ॥५॥
बलभिमराय ऐसे करी । निश्चय झाला भागीरथीसी ॥६॥
पद ४७
चाल -देरे हरि संत पदाची०
दे रे हरि ब्रह्मरसाची गोडी ॥ध्रृ०॥
विषयानंद तुच्छ दाखविसी । छंद लाविसी चरणी ॥१॥
पंचविषय विषतुल्य करोनी । अमृत दावि नयनी ॥२॥
कर्मोपासना करितां न चुके । जन्ममरण -फेरी ॥३॥
बलभिमराये सद्बल देउनि । जडवीले कोंदणी ॥४॥
ठकूदासी विनवीते तुज । ठेवी रत चरणी ॥५॥
अभंग ४८
चाल -त्यजि भक्तासाठी०
धरुनि सद्गुरुचा हात । जन्ममरणाच करा घात ॥१॥
मरणासी मरणे मरुनी । राहे निर्भय तूं होवोनि ॥२॥
पिंडब्रह्मांड शोधोनि । पाहा चैतन्य नयनी ॥३॥
माया मूळमाया त्यागोनि । राहे चिदानंदभुवनी ॥४॥
बलभीम माझे सद्गुरु । नाही तेथे भेदाभेदू ॥५॥
पद ४९
चाल -निःसंग मुरली झाले०
गुरुरायाने नवलाव केले । अद्भुत पद दावियेले ॥ध्रृ०॥
ना मी स्त्री ना मी नपुंसक । ना मी पुरुष असे ॥१॥
ना मी तीर्थ ना मी क्षेत्र । ना मी नक्षत्र असे ॥२॥
ना मी भूत ना मी दैवत । ना मी अष्टसिद्धि असे ॥३॥
ना मी जीव ना मी शीव । ना मी ज्ञानाज्ञान असे ॥४॥
बलभीमचरणी भागिरथीही । परब्रह्मी सदैव डोले ॥५॥
अभंग ५०
सद्गुरु माझी आई , कृपापान्हा देई ॥
कर्माची पत्रिका मज कां आली ॥१॥
तुझी माझी तुटी न साहे , जननी ॥
कधी भेट देशी तान्हुल्याशी ॥२॥
कधी ऐसी दशा येइल माझे आंगी ॥
चित्त सहजानंदी रंगीजेल ॥३॥
ऐसी पात्र कधी होईन लाभासी ॥
मन उत्साह मूर्तीशी लावीन मी ॥४॥
बलभीमचरणी बलची घेईन ॥
ठकूऽशी ठक , पडेल केव्हां ॥५॥