शिवरात्र - गणांची तल्लीनता

ऐसे ते भजन रंगांत की आले । कोणी न ऐके भले पार्वतीचे ॥१॥
कडीये घेवोनी शिव नाचताती । केस मोकळे होती तेव्हा तीचे ॥२॥
अस्ताव्यस्त झाला सकळ परिवेष । परि बहु आवेश नाचण्याचा ॥३॥
कोणी नाही जागा सकळ तल्लीन । आनंदाचा घन मिसळता ॥४॥
शिवासंगे नाचतां समाधिनिर्भर । आनंदासी भर थोर आला ॥५॥
आनंदसागरी बुडोनि राहिले । प्रमत्त बनले आनंदाने ॥६॥
आनंदाचा कैफ़ आला आंगावरी । आनंद अंतरी समावेना ॥७॥
उन्मत्त बनले बहुत नाचती । आनंदाची स्थिति वर्णवेना ॥८॥
कधी न अनुभविले ऐसे प्राप्त झाले । मन भरुनी गेले तेव्हा त्यांचे ॥९॥
मन ते मरतां प्रकाश पडला । ऐक्याच्या रुपाला अनुभविती ॥१०॥
विनायक म्हणे ऐक्य ते पावोनी । शिवालागी ध्यानी अनुभवीती ॥११॥