विठ्ठल जीवाचा सांगाती । विठ्ठल वसे सर्वां भूतीं ।
विठ्ठल दिसतसे सुषुप्ती । स्वप्न जागृति विठ्ठल ॥१॥
विठ्ठल सर्वांचा आधार । विठ्ठल मुक्तीचें माहेर ।
विठ्ठल साराचेंही सार । विश्वाधार विठ्ठल ॥२॥
विठ्ठल साधन परब्रम्ह । विठ्ठल कैवल्याचें धाम ।
विठ्ठल नाम परम । हरती श्रम जन्माचे ॥३॥
विठ्ठल सर्वस्वें उदार । उभारिला अभयकार ।
रुक्मादेवीस्वामी वर । करुणाकर विठ्ठल ॥४॥
विठ्ठल सकळांचा दाता । विठ्ठल सर्वां अधिष्ठिता ।
विठ्ठल भर्ता आणि भोक्ता । विठ्ठल दाता दीनाचा ॥५॥
विठ्ठल गुणांचा गुणनिधि । विठ्ठल करुणेचा उदधि ।
विठ्ठल माझी सर्व सिद्धि। विठ्ठल विधिविधान ॥६॥
विठ्ठल जीवाचा हा जीव । विठ्ठल भावाचाही भाव ।
तुका म्हणे गुणार्णव । भावाभाव विठ्ठल ॥७॥