जय मृत्युंजय - हिंदुराष्ट्र अन् हिंदुचा ...

हिंदुराष्ट्र अन् हिंदुचा ध्वज
करो नियंत्रित हिंदुस्थानला ।
गाणे माझे गाऊ द्या मला ॥धृ०॥
बीज वडाचे राईएवढे ।
सुप्तस्फूर्ती येई जो पुढे
झाड भूवरी वाढे केवढे ।
पुनरुत्थापन-शक्तिसवे त्या
भारतांतला हिंदु जन्मला ।
गाणे माझे गाऊ द्या मला ॥१॥
इतिहासांतुनि वाटे जे मना ।
त्याच्या करतो मी रेखाटना ।
ठरो सत्य वा केवळ वल्गना ।
स्वतंत्र उन्नत उदात्त भारत
जगांत मिरवत पाहू द्या मला ।
गाणे माझे गाऊ द्या मला ॥२॥
म्हणोत मजला वेड, मूढ वा ।
माते विजयाअंती आठवा ।
ठरेन तेव्हा द्रष्टा मी नवा ।
तुम्हां वारसा या स्वप्नाचा
या कार्याचा देतो आजला ।
गाणे माझे गाऊ द्या मला ॥३॥