प्रसंग दहावा - प्रसंग प्रशस्‍ति

ॐ नमोजी भाव भक्ति अक्षर ओळी । चरणबंध कवित्‍व प्रभावळी । नित्‍य निजानंद अक्षरें सोंवळीं । समाधान पावोनियां ॥१॥
अहो जी धीर निष्‍कलंक सद्‌गुरु । पुरता परिसोनि माझा विचारु । मज सनाथ करुनी वेरझारु । चुकवावी माझी ॥२॥
माझेंनि मुखें माझी भव यातना । ऐका जी सद्‌गुरु निजलोचना । तेणें तुमचिया समाधाना । निपजेल माया ॥३॥
रंकास जालिया जुलुम जांचणी । ते आड पडावया धांवे दिवाणीं । तैसा माझा सोस तुमच्या चरणीं । चित्त मनसेंसी एकाग्र ॥४॥
तंव सद्‌गुरूस आली महा करुणा । शम सम अवलोकी उदार राणा । शेख महंमद सांगे भवयातना । ते परियेसा स्‍वामी ॥५॥