घट तिचा रिकामा

घट तिचा रिकामा झर्‍यावरी,

त्या चुंबिति नाचुनि जळलहरी. ध्रु०

अशी कशी ही जादू घडली ?

बघतां बघतां कशी हरपली ?

का समजुनिया राणी अपुली

तिस उचलुनि नेई कुणी परी ? १

मिळत चालल्या तीनी सांजा,

दिवसाचा हा धुसर राजा,

चंद्रा सोपुनि अपुल्या काजा

घे निरोप कवळुनि जगा करीं. २

पलीकडे त्या करुनि कापणी

बसल्या बाया हुश्श करोनी,

विनोद करिती, रमती हसुनी,

जा पहा तिथे कुणी ही भ्रमरी. ३

तिथे वडाच्या पाळीभवती,

नवसास्तव मृगनयना जमती;

कुजबुजुनी गुजगोष्टी हसती,

रतिमंजरि हेरा तिथे तरी. ४

तांदुळ पदरीं, बिल्वदळ करीं

चरण क्षाळुनि जवळ तळ्यावरि,

जमति शिवालयिं पोक्त सुंदरी;

फिरकणी बघा ही त्यांत तरी. ५

पलीकडे वेळूंची जाळी;

तेथें वारा धुडगुस घाली,

शीळ गोड तीमधुनि निघाली,

ही झुळुक हरपली लकिरिपरी. ६