मिथ्यापवादवधबन्धनिराश्रयं च
मित्रातिवैरधनधान्यकलत्रशोकम् ।
आशानिराशकृतनिष्फलसर्वशून्यं
कुर्याच्छनैश्चरदशासततं नराणाम् ॥१॥
शनिमध्ये शनिफलम् ।
शनैश्चराद्देहपीडा पुत्रदारैश्च विग्रहः ।
स्त्रीकृते बुद्धिनाशश्च विदेशगमनं भवेत् ॥२॥
शनिमध्ये बुधफलम् ।
सौभाग्यं सौख्यविजयं बोधसंस्थानमानतः ।
सुत्दृद्वित्तप्रदं सौख्यं सौरस्यान्तर्गते बुधे ॥३॥
शनिमध्ये केतुफलम् ।
रक्तपित्तकृता पीडा वित्तवित्तानुसङ्ग्रहः ।
दुःस्वप्नं बन्धनं चैव केतावन्तर्गते शनेः ॥४॥
शनिमध्ये शुक्रफलम् ।
सुत्दृद्वन्धुवशीयुक्तं भार्यावित्तं जयान्वितम् ।
सुखसौभाग्यवात्सल्यं सौरस्यान्तर्गते सिते ॥५॥
शनिमध्ये रविफलम् ।
पुत्रदारधनैर्नाशं करोति समयं महत् ।
सौरस्यान्तर्गते भानौ जीवितस्यापि संशयः ॥६॥
शनिमध्ये चन्द्रफलम् ।
मरणं स्त्रीवियोगश्च बन्धूद्वेगोऽसुखं श्रृणु ।
क्रुद्धमारुरुजो रोगं विधावन्तर्गते शनेः ॥७॥
शनिमध्ये भौमफलम् ।
देशभ्रंशं तथा दुःखं कुरुते व्याधिभ्रंशता ।
अन्तर्दशायां सौरस्य कुजः प्राणमहद्भयम् ॥८॥
शनिमध्ये राहुफलम् ।
श्वभ्रावाताङ्गभेदश्च ज्वरातीसारपीडनम् ।
शत्रुभङ्गोऽर्थनाशश्च राहोरन्तर्गते शनौ ॥९॥
शनिमध्ये गुरुफलम् ।
देवार्चनं द्विजः सौख्यं बहुभृत्यगुणैर्युतम् ।
स्थानप्राप्तिं गुरुः कुर्यात्सौरस्यान्तर्गता दशा ॥१०॥