नामदेवाचें चरित्र - साक्ष आल्यावरी कष्टी जहाल...

साक्ष आल्यावरी कष्टी जहाली मनीं । मारिलें पापिणी नामयासी ॥१॥
मारिलें म्हणोनि महा शोक करी । जेवूनियां घरीं आला नामा ॥२॥
नामा आला घरा पाहे मातेकडे । आनंदानें रडे गोणाबाई ॥३॥
नामा विनवित दोन्ही कर जोडोनि । लागला चरणीं गोणाईच्या ॥४॥
नामा म्हणे माते कां शोक करिसी । सांग मजपाशीं कायजाहालें ॥५॥
माता म्हणे आतां काय सांगूं नाम्या । साक्ष माझ्या मना आली आजी ॥६॥
कवाडा आडून देखियेलें आम्हीं । जेवियेला तुम्ही तिघेजण ॥७॥
व्यर्थ मी मारिलें केला जाच तुज । ऐसा भक्तराज गांजियेला ॥८॥
आतां मज देव कोपेल विठ्ठल । ऐसी माता बोले गोंदा म्हणे ॥९॥