श्री जगन्नाथ बोवा बोरीकर

धन्य धन्य अवतारचि केवळ जगन्नाथ दासाचा । ज्ञानभक्तिवैराग्यविराजित जगदोद्धारक साचा ॥धृ०॥
पतित पावन व्हाया देशोदेशीं वास जयांचा । जिकडे तिकडे थाट चालविति कीर्तन सप्ताहांचा ॥ध०॥१॥
निरहंकारी प्रेमळ भारी स्वभाव शांत मनाचा । इंद्रियनिग्रह बळकट जैसा परिसों योगि शुकाचा ॥ध०॥२॥
नरनारी आबालवृद्ध यां जिवलग होय जिवाचा । निंदास्तुति सम अद्वय भावें भोक्ता भजनसुखाचा ॥ध०॥३॥
कोणी कांहिं म्हणो आवडता कृष्णजगन्नाथचा । भला भला सत्पुरुष लाभला पुतळा भक्तिरसाचा ॥ध०॥४॥