उत्तरभागः - अध्यायः ३६

सनत्कुमार उवाच ॥
लक्ष्मीदानं प्रवक्ष्यामि महदैश्वर्यवर्धनम् ॥
पूर्वोक्तमंडपेकार्यं वेदिकोपरिमंडले ॥१॥

श्रीदेवीमतुलां कृत्वा हिरण्येन यथाविधि ॥
सहस्रेण तदर्धेन तदर्धार्धेन वा पुनः ॥२॥

अष्टोत्तरशतेनापि सर्वलक्षणसंयुताम् ॥
मंडले विन्यसेल्लक्ष्मीं सर्वालंकारसंयुताम् ॥३॥

तस्यास्तु दक्षिणे भागे स्थंडिले विष्णुमर्चयेत् ॥
अर्चयित्वा विधानेन श्रीसुक्तेन सुरेश्वरीम् ॥४॥

अर्चयेद्विष्णुगायत्र्या विष्णुं विश्वगुरुं हरिम् ॥
आराध्य विधिना देवीं पूर्ववद्धोम माचरेत् ॥५॥

समिद्ध्रुत्वा विधानेन आज्याहुतिमथाचरेत् ॥
पृथगष्टोरशतं होमयेद्ब्राह्मणोत्तमैः ॥६॥

आहूय यजमानं तु तस्याः पूर्वदिशि स्थले ॥
तस्मै तां दर्शयेद्देवीं दंडवत्प्रणमोत्क्षितौ ॥७॥

प्रणम्य विष्णुं तत्रस्थं शिवं पूर्ववदर्चयेत् ॥
तस्या विंशतिभागं तु दक्षिणा परिकीर्तिता ॥८॥

तदर्धांशं तु दातव्यमितरेषां यथार्हतः ॥
ततस्तु होमयेच्छंभुं भक्तो योगी विशेषतः ॥९॥

इति श्रीलिंगमहापुराणे उत्तरभागे लक्ष्मीदानविधिनिरूपणं नाम षट्त्रिंशत्तमोऽध्यायः ॥३६॥