पद - जय भवानि

जय भवानि भवानि बोल । तुझें वचनामृत सुविलोल ॥धृ०॥
भार्गवरामाच्या परि आम्हां । समसमान वजनीं तोल ॥१॥
जननि दिनाची, श्रुति वचनाची । नको करुं प्रतिज्ञा फोल ॥२॥
धीर धरवेना, मज तरवेना । भवसागर खोलचि खोल ॥३॥
काढ मी फसलों, तुडवित बसलों । महापाप चिखोल चिखोल ॥४॥
घडिमधें तोडिसि, मोडिसी जोडिसी । शतकोटी विरंची गोल ॥५॥
ये, माझे आई, तूं रेणुके आई । तुझ्या चढल कीर्तिला मोल ॥६॥
विष्णुदास म्हणें, तरि काय गाणें । तूं जरी न देसिल डोल ॥७॥