पद - काय कारण

( चाल : क्या कलम खुदाने जिमारा )
काय कारण पुसा रेणुकेला
माझा त्याग कशास्तव केला ? ॥ध्रृ०॥
झाला वर्षाच्या वर एक महिना
तरि अझूनि सय कां हो येइ ना
अशि अगदींच नको करुं दैना
तुझ्याविण मला बाप - आई ना
दूर काननीं पडलों एकला ॥ माझा० ॥१॥
भला भार्गवराम प्रतापी
गळा आपुल्या जननीचा कापी
परि तैशाची केलीस माफी
माझे अन्याय लाविसी मापीं
कां रुसलीस या घटकेला ॥ माझा० ॥२॥
जन्मा घातलें हा अविचार
आतां जन्मदे, काय विचार
प्रेमें चालवी प्रेमप्रचार
तुझे वर्णिति गुण वेद चार
तुझ्या वंदितों मी पादुकेला ॥ माझा० ॥३॥
माझ्या पहाशिल अवगुणाला
उणें येईल जननीपणाला
दृढ बांधिलें ब्रीद कंकणाला
याची तरि मग लाज कुणाला
कां लाविसि मजसि भिकेला ॥ माझा० ॥४॥
निज चर्माचा सदाचरणांत
जोडा घालिन तुझ्या चरणांत
तुझ्या राहीन माय ऋणांत
सडा टाकिन मी अंगणांत
नित्य गुंफिन पद - मालिकेला ॥ माझा० ॥५॥
रत कामना काममदासी
जशि गुंतली माशी मधासी
काढि यांतुनि, आली उदासी
छाया कृपेची करी विष्णुदासीं
नमो नारायणी अंबिकेला ॥ माझा० ॥६॥