जसें तुमचें मरणें, तसें माझें सती जाणें

मराठी वाक्संप्रदाय - वाक्यप्रचार

    एक मनुष्‍य होता. तो आपल्‍या बायकोवर आपले फार प्रेम आहे असे दाखवी. बायकोहि त्‍यावर आपले अत्‍यंत प्रेम असून तो मेल्‍यास आपण क्षणभरहि प्राण ठेवणार नाही, लागलीच सती जाऊं असे त्‍यास सांगत असे. आपल्‍या पत्‍नीच्या प्रेमाची परीक्षा पाहावी असे एकदां त्‍याच्या मनात आले. तेव्हां एक दिवशी तो आपल्‍या घरातील अडगळीच्या व अगदी लहान दार असलेल्‍या खोलीत मरणाचे सोंग घेऊन पडला. त्‍या खोलीतून त्‍यास सरळ बाहेर काढणें शक्‍य नव्हते. तेव्हां त्‍याच्या मित्रांनी जमून त्‍या खोलीची एक भिंत पाडावयाचे ठरविले. हे एकून त्‍याच्या बायकोस भिंत पाडणें बरे न वाटून तिने एक कोयता किंवा तलवार आणून दिली व त्‍या प्रेताचे तुकडे करून बाहेर काढावयास सांगितले. जेव्हां हे त्‍या नवर्‍याने ऐकले तेव्हां त्‍याच्याने गप्प बसवले नाही व तो उठून येऊन आपल्‍या बायकोवर खूप रागावला आणि अशीच कां तू सती जाणार, म्‍हणून त्‍याने तीस विचारले. तेव्हां तिने सांगितले की, जसे तुमचे मरणें तसे माझे सती जाणें. तुम्‍ही जर खरोखर मेला असतां तर मी सती गेले असते. याप्रमाणें जसा कारभार खोटा असेल तसा त्‍याचा परिणामहि खोटा असतो. तु०-गजोपि मिथ्‍या पलायनोपि मिथ्‍या।