बृहत्पाराशरहोराशास्त्रम् - अध्याय ६७

एवं सलग्नखेटानां विधायाष्टकवर्गकम् ।
त्रिकोणशोधनं कुर्यादादौ सर्वंषु राशिषु ॥१॥
त्रिकोणं कथ्यते विप्र मेषसिंहधनूंष्यथ ।
वृषकन्यामृगस्याश्च युग्मतौलिघटास्तथा ॥२॥
कर्कवृश्चिकमीनाश्च त्रिकोणाः स्युः परस्परम् ।
अधोऽधः सर्वराशीनामष्टवर्गफलं न्यसेत् ॥३॥
त्रिकोणेषु च यन्न्यूनं तत्तुल्यं त्रिषु शोधयेत् ।
एकस्मिन् भवने शून्यं तत् त्रिकोणं न शोधयेत् ॥४॥
समत्वे सर्वगेहेषु सर्वं संशोधयेद् बुधः ।
पश्चात् विपश्चिता कार्यमेकाधिपतिशोधनम् ॥५॥