अज्ञातवासी - धडधडा झडे चौघडा, गडावर चढ...

धडधडा झडे चौघडा, गडावर चढे मर्द फांकडा
अवघड गड अस्मानी डोले
वरतीं बघतां फिरतिल डोळे
खालीं पाताळांतिल इमले
आसर्‍यास बाजुस कडा, गडावर चढे मर्द फांकडा     १
अजुनि तांबडें नाहीं फुटलें
फटीफटींतुनि गवत कोंवळें
वार्‍याच्या झुळुकेनें हाले
शोभतो दंवाचा सडा, गडावर चढे मर्द फांकडा     २
हातांतिल तल्वार ठिबकते
पाठीवर वाघीण नाहते
‘ करील कौतुक ती, ’ मन वदतें
चालला शिपाई खडा, गडावर चढे मर्द फांकडा     ३
गडावरुन खिडकींतुन कोणी
एकसारखी टक लावोनी
बघे स्वारिला डोळे भरुनी
सरदार धन एवढा, गडावर चढे मर्द फांकडा.     ४