असे बोलवते तरी कसे

शीः ! नकोच बोवा... !
हे काय मध्येच ?
आपण नाही येत त्याच्याकडे !
आता चांगला त्याच्या घरापर्यंत आला आहेस... अन् मध्येच
नकोच पण !... चल ! फिर मागे...
पण असे बिथरायला झाले काय ?
कपाळ तुझे आणि माझे !
असे काय, सांगशील तर खरे !
किती किळसवाणे... ! अन् अश्लील बोलत होते काल ते ! अजून... अजून माझ्या डोक्यात... छे !...
अरे पण तू तर नाहीस ना... !
अरे मी नसलो म्हणून काय झाले ? ऐकलेले तर - !
जाऊ दे रे ! कालचे काल ! आज काय त्याचे !
‘ आज काय त्याचे ? ’ कोण इथे घाण साचून बसली आहे... अन् म्हणे... !
असेल ! जायला काय... ?
कसे जायचे रे ! म्हणे ‘ जायला काय... ? ’ गेलो तिथे अन् त्याची बायको दृष्टीस पडली म्हणजे मग !... कोणत्या नजरेने पाहायचे त्यांच्याकडे ! असल्या घाणेरड्या... अन् किळसवाण्या... ?
क्च् !! विलक्षण आहे बोवा !
असेल !.... नाही... त्यांच्यापुढे जायची... आपली नाही छाती होत !
काही तू म्हणतोस तेही...
तर काय रे ! अन् मी म्हणतो, इतके कसे या लोकांना काही... ! आपल्या घरात बायका असतात नसतात... त्यांच्याबद्दल काहीच कसे यांना... !!
वाटते !... वाटते !!