लोकगीत - गीत एकतीसावे

हरि बा हरि नारायण धन बा धन नारायण ।
हरहर पंढरी काय वो झाली । समदी सोन्यानं मढवली ।
विठ्ठलदेव राज करी ।
राज करीता करीता । गेला माळणीच्या मळा ।
आणलीं शेवंतीची रोप ।
टाकिलीं वंजार्‍याच्या घरीं । वंजारीदादा पाणी घाली ।
पाणी घालीता घालीता । त्याला कळ्या आल्या भारी ।
राम तोडी । लक्ष्मण दुरडया भरी ।
या दुरडयाच्या काय काय परी । नाग डुलतो चाफ्यावरी ।
यावं हरि बसावं  पलंगावरी । आबीरबुक्का झोकितो गळ्यावरी ।
हर हर पंढरी कायवो झाली ।