स्त्रीगीत - रामाचा पाळणा

हलविते पाळणा माता कौसल्या
जो जो रे रामराया, जो जो रे रामराया ॥धृ॥
सुकुमार देहाची श्यामल कांती
नेत्रांत शोभती तेजाच्या ज्योती
आनंद मायेना माझी ये चित्ती
लिंबलोण या ग या ग उतराया ॥१॥
नटुनि सजुनि आल्या ह्या नारी
उंची अहेरांच्या आणिल्या परी
पाहुनि घ्यावी कलाकुसरी
कौतुकांत न्हाली इवलीशी काया ॥२॥
कुणि घ्या हा राम राम मनोहर
सदैव घाला प्रेमाची पाखर
वाढेल दिसमासा त्रैलोक्यसुंदर
सोत्सुक पाहते माऊलीची माया ॥३॥
धन्य ही अयोध्या धन्य सूर्यवंश
जन्मला जेथे स्वयेच ईध
भाग्य कौसल्येचे अहो विशेष
घेई अवतार दुष्टासी दंडाया ॥४॥