श्रीदत्त भजन गाथा - भीष्म प्रतिज्ञा

भारती युद्धांत भीष्म प्रतिज्ञा करी । पाण्डवां साचारी मारीन मी ॥१॥
अपुल्या शिबिरांत बोले पितामह । कोणासी सन्देह तेव्हां पडे ॥२॥
दूतमुखे वार्ता ऐकतां श्रवणी । कोणा अंत:करणी पीडा झाली ॥३॥
कोण गडबडला पाण्डवांचे साठी । सांग जगजेठी तुजवीण ॥४॥
कोणें द्रौपदीसी भीष्मपदांवरी । नेउनी शिबिरी घातले बा ॥५॥
विचारितां तये गडी दौपदींचा । कोण अशि वाचा बोलियेला ॥६॥
सांडुनियां लाज झालासि चाकर । भक्तांचा साचार दत्तात्रेया ॥७॥
विनायक म्हणे माझा अभिमान । कोण दयाघन तुजवीण ॥८॥