श्री गुरूचे पद - ग बाईये पतीतपावन साधू । च...

ग बाईये पतीतपावन साधू । चित्तीं अखंड लागला वेधू ।
मायाअविद्यातीत निजबोधू । ज्याचे हातीं वसे गोविंदू ॥ध्रु.॥
संतसंगाचा महिमा मोठा । लक्षचौर्‍यांसी दिधला फांटा ।
भवरोगासी लविले वाटा । भावभजनें भरिल्या पेठा ॥१॥
रामनामाचें केणें उघडें । देतां घेतां अधिक चि वाढे ।
भाग्यसंचित असतां घडे । तेथें न चले कुडे पवाडे ॥२॥
स्वानुभवाचा कौल पिकला । सर्व कल्याण उदयो जाला ।
लुलु ममताचंद्र मावळला । षड्‍रिपुसी पळ सुटला ॥३॥