श्रीनारदभक्तिसूत्रें - सूत्र ८१

म्हणोनि द्विवार सांगति । भक्तिचें श्रेष्ठत्व प्रतिपादिती । भक्तीवीण नव्हे प्राप्ति । ऐसा जाणा निश्चय ॥११३३॥
भक्ति म्हणजे परमप्रीति । अखंड स्मरण ध्यानीं रति । देहीं असोनि विदेह स्थिति । अनुभवासी येईल ॥११३४॥
मुक्तीवरील भक्ति जाण । अखंड मुखीं नामस्मरण । हेंचि जीवन्मुक्त लक्षण । सकल संतीं अनुभविलें ॥११३५॥
आतां हेचिं भक्तिसाधन । अखंड स्मरण आणि ध्यान । एकादश प्रकारें विवरून । दविती सूत्रीं पुढील ॥११३६॥