धर्मसिंधु - राशिकूट

वराचे राशीपासून वधूची राशि अथवा वधूचे राशीपासून वराची राशि दुसरी व बारावी असता निर्धनत्व येते. नववी व पाचवी असता निःपुत्रत्व येते. सहावी व आठवी असता मरण अथवा विपत्ति येते. एकमेकांची एकमेकांपासून सातवी, तिसरी, अकरावी अथवा चवथी राशि असता शुभ होय. एक नक्षत्र असून भिन्न चरण असेल तर शुभ होय. एक राशि असली तर अतिशुभ होय. एक नक्षत्र असून भिन्न राशि असेल तर शुभ होय व राशिकूटाचा दोष नाही. नक्षत्र भिन्न असून एक राशि असेल तर शुभ होय व नाडीचा आणि गणाचा दोष नाही. नक्षत्र चरण एक आणि परस्परांचे राशीपासून परस्परांची राशि सहावी व आठवी असता वर्ज्य होय. द्विर्द्वादशक आणि नवपंचम ही मध्यम होत. बाकी शुभ होय. यासंबंधाचे गुण- सत्कूट असता सात गुण. दुष्टकूट असून ग्रहमैत्री असेल तर चार गुण; दोहोंतून एक असता एक गुण. नक्षत्रचरण एक असल्यास शून्य गुण.