धर्मसिंधु - सपिंडीकरण

सपिंडीकरणानंतर त्याच्या श्राद्धामात्री भोजन करू नये. पहिल्या वर्षी भोजन केल्याने अस्थि इत्यादिकांचे भोजन करणारा, दुसर्‍या वर्षी मांसभक्षक; तिसर्‍या वर्षी रक्तभोजी व चौथ्यावर्षी ते श्राद्ध शुद्ध होय, याप्रमाणे प्रासंगिक विषय पुरे. आता प्राकृत विषयाचा विचार करू. पार्वणरूप असले तरी हिरण्यश्राद्ध व आमश्राद्ध ही श्राद्धे दिवसाचे दोन भाग करून पूर्वभागातच करावी. सर्व श्राद्धे त्याच्या त्याच्या निर्णात काली त्याच्या तिथीचा अभाव असला तरी करावी. कारण साकल्य वचनादिकांवरून व शास्त्रावरून त्या काली ती तिथी आहे असे 'कालत्व' विवेचन ग्रंथात सांगितले आहे. प्रातः काली व संगवकाळी वृद्धिश्राद्ध करावे. मध्यान्हकाल गौण आहे. अपराह्ण, सायान्ह व रात्री हे काल निषिद्ध होत. रात्री विवाह करावयाचा असता प्रातःकाल वृद्धिश्राद्ध केले नाही तर ते रात्रीही करावे, असे कित्येक ग्रंथात आहे. ग्रहण निमित्तक पार्वण श्राद्ध व पुत्रजन्म निमित्तक जातकर्मांगभूत वृद्धिश्राद्ध रात्रीही करावे. याप्रमाणे कालाचा निर्णय सांगितला.