४९३ .
केला काशी विश्वेश्वर । सेतुबंध रामेश्वर ॥१॥
तरी संशय तुटेना । पूर्वगुण पालटेना ॥ध्रु०॥
भागीरथी गोदावरी । केली कृष्णा आणि कावेरी ॥२॥
राम अयोध्येचा पति । केली कृष्णा द्वारावती ॥३॥
बद्रि ओढ्याजगन्नाथ । केला स्वामी त्रिमलनाथ ॥४॥
मातापूर तुळजापूर । सप्तशृंगी कोल्हापूर ॥५॥
केली पंढरी नरहरि । शंभु पाहिला शिखरी ॥६॥
मोरेश्वर भुलेश्वर । ज्वालामुखी हरेश्वर ॥७॥
सिद्ध मैराळ मारुति । देव केले नेणो किती ॥८॥
बारा लिंगे यांवेगळी । तीर्थे केली भूमंडळी ॥९॥
रामदास म्हणे भावे । आपुले मन आटोपावे ॥१०॥
४९४ .
मुख्य पूजा परंपार । एकाहूनी एक थोर ॥१॥
आतां कोठे ठेवूं भाव । बहुसाल जाले देव ॥ध्रु०॥
माझे कुळीची दैवते । पाहो जातां असंख्याते ॥२॥
रामकृष्ण महादेव । बनशंकरी खंडेराव ॥३॥
माता सटवाई आपण । स्वामी लक्ष्मीनारायण ॥४॥
वीर बैसविला देव्हारां । माझी माता एकवीरा ॥५॥
मायराणी पांडुरंग । मुंज्या नृसिंह झोंटिंग ॥६॥
महालक्ष्मी रवळया । कुळदैवत मोरया ॥७॥
अउंदीची यमाबाई । सप्तशृंगी चंडाबाई ॥८॥
तुळजापूरची तुकाई । घाटमाथांची नवलाई ॥९॥
दंडपाणी जोगेश्वरी । माता कामाक्षी कावेरी ॥१०॥
मेसाबाई नारायण । आग्यावेताळ कारण ॥११॥
पूजा जोगिणी मांगिणी । बहुसाल मानविणी ॥१२॥
सात पांच रंगनाथ । व्यंकटेश वैजनाथ ॥१३॥
धोपेश्वर कोपेश्वर । सिद्धेश्वर सोमेश्वर ॥१४॥
अन्नपूर्णा शालिग्राम । हयग्रीव मेघश्याम ॥१५॥
परशुराम कोटेश्वर । नाना भक्ति परमेश्वर ॥१६॥
म्हेकावती भोगावती । आमच्या देव्हारांच्या संती ॥१७॥
राणादेवी नारायण । म्हैसासुर मल्लिकार्जुन ॥१८॥
अग्निसारखे दैवत । आणि मुख्य प्राणनाथ ॥१९॥
देव तांबडे अनेक । बहुसाल केले टांक ॥२०॥
तांबे दैवत नर्मदे । देवदाटले नुसदे ॥२१॥
सूर्यकांत सोमकांत । नागनाणी चक्रांकित ॥२२॥
औट मृत्तिकापूजन । नाना देवांचे लेखन ॥२३॥
डाउ पूजावे अनंत । गौरी आणि कपोईत ॥२४॥
रामदासी देव एक । येर सर्वही मायिक ॥२५॥
४९५ .
एक उपासना धरी । भक्ति भावे करी ॥१॥
तेणे संशय तुटती । पूर्वगुण पालटती ॥ध्रु०॥
सर्व नैश्वर जाणोन । वृत्ति करी उदासीन ॥२॥
सत्य वस्तूच साचार । त्याचा करावा विचार ॥३॥
त्यागोनियां अनर्गळा । सदा असावे निर्मळ ॥४॥
ध्याने आवरावे मन । आणि इंद्रियदमन ॥५॥
अखंड वाचे रामनाम । स्नान संध्या नित्यनेम ॥६॥
दास म्हणे सर्व भाव । जेथे भाव तेथे देव ॥७॥
४९६ .
कर्मे चित्तशुद्धि होऊनियां गेली । मग उपासिली उपासना ॥१॥
उपासनामिसे देव ठायी पडे । संदेहचि उडे एकसरां ॥२॥
एकसरां पंथ सापडे सुगम । जैसा विहंगम फळावरी ॥३॥
फळावरी झड जातां अनायासी । निर्फळ असोसी वायावीण ॥४॥
वायावीण शीण कासया करावा । निर्फळ जाणावा संसार हा ॥५॥
संसाराचा सोस कर्मी निजध्यास । तेणे जगदीश अंतरला ॥६॥
अंतरला देव अंतरो नेदावा । विवेक पहावा सज्जनाचा ॥७॥
सज्जनांचा योग सर्वांचा वियोग । अनित्याचा त्याग चमत्कारे ॥८॥
चमत्कारे त्याग तत्त्वविवरणे । सीघ्रचि पावणे मोक्षपद ॥९॥
मोक्षपद ज्ञाने रामदासी जाले । बंधन तुटले संसाराचे ॥१०॥