भारूड - रजक

९७१.
( राग-भैरव; ताल-दीपचंदी )
रे मी निंदक आलो राघवे धाडिलो ।
धुतां धुतां आळस आला जिवे मारिलो ॥ध्रु०॥
मी रजक तुमचा नफर फुकाचा ।
तुकडाही नलगे आम्हां थोरपणाचा ॥१॥
देहबुद्धि मळकी नवां ठायी फाटकी ।
ते द्या रे मजपाशी मी धुतो नेटकी ॥२॥
अरे मी नफर असतां कां मळिण दिसतां ।
मळे द्याल की नेद्याल मी नये मागुता ॥३॥
आस जो करीं दंभ जो धरी । मूर्ख त्यां सरी दुसरी नाही ॥४॥
वृत्ति वळेना अभिमान गळेना । किती धुवूं वाजी आलो डाग ढळेना ॥५॥
स्नेह लागले बहुत मळले । धुतां धुतां ऊन देतां निर्मळ जाले ॥६॥
रामदास रे राम त्यास रे । यातिकुळ आढळेना भेदभास रे ॥७॥