गज्जलाञ्जलि - किती सृष्टीमधे सौन्दर्य द...

किती सृष्टीमधे सौन्दर्य देखावे,
परी तेथे न माझें गीत झेपावे.

करी आक्रोश हें रानीं तमीं जेथे
पडे घायाळ आशा प्रीतिच्या घावें.

कुणी ओढूनि याला आणिलें येथे
सफाऊने अरण्यीं देऊनी कावे ?

हवें जीवास तें लाभे रडूनी का ?
सदाच जीव हा वार्‍यावरी धावे

मुखीं घोळे जनांच्या शब्द गीताचा -
परन्तू गूज शब्दाचें तुला ठावें.

न ऐकूं ये तुला, तू ऊन्च शैलाग्रीं -
तिथे दूरान्तरें गोडीच तो पावे.

१ जुलै १९३१