गज्जलाञ्जलि - रम्य लाली अम्बरीं राहिली ...

रम्य लाली अम्बरीं राहिली ही फाकुनी -
पालथ्या पेल्यांत या कोण साण्डी वारुणी ?

ऐक या पेल्यामधे रङगली सन्ध्या मदें,
‘घ्या !’ रसज्ञांना वदे, ‘घ्या सुरा नानागुणी’.

काय काव्यानन्द तो रोमरोमीं स्पन्दतो !
जाहला सूरीन्द्र जो तो सुरेच्या या ऋणी.

ही जणू विद्युल्लता काचपात्री नाचतां
ऊर्वशीची कां कथा ? मोहिनी वाटे कुणी.

संसृतीची काळजी घालवी तत्काळ जी,
फाटूं द्या आकाशही ही क्षणीं त्याला तुणी.

सिन्धुकन्या सुन्दरी स्वर्ग आणी भूवरी,
आदिशक्तीहूनि या सेव्य आहे का कुणी ?

४ फेब्रुवारी १९२६