गज्जलाञ्जलि - मानिनि, जाणार तुझा राग कध...

मानिनि, जाणार तुझा राग कधी ?
हास गडे, बोल गडे, कां अवधी ?

तापुनिही बोल, सुखें साहिन तें,
दुस्सह हा होय अबोला अगदी.

बोल ऊधारी न न कुणालाहि रुचो,
त्यास गणीं ऐवज मी गे नगदी.

पाप तयाचें बघ तूझ्याच वरी.
मौन जरी गुप्तपणें जीव वधी.

तू तिकडे, मी ऐकडे आणि मधे
काय वहाणारच निश्शब्द नदी ?

थाम्बुनि दोधेंहि दुरी हे पडलों,
सूचवि काहीच न का सप्तपदी ?

वाट बघें मी, न बघे काळ परी,
दे न पुन्हा हा क्षण तो निर्दय - धी.

खूण जराशीच करीं तू नयनें,
पोहुनि येऊन तिथे मी जलदी.

३० सप्टेम्बर १९३२