भावगंगा - याचे डोळे लाल लाल

याचे डोळे लाल लाल
याच्या हातीं मशाल
याच्या वाणीत देवाची गोडी; अहा!
याची थैथैती नाचती जवानी पहा ॥धृ॥
योगेश्वर व्यापी याच्या अंगाप्रत्यंगा
योद्धा हा सज्ज वरी केसरीय्र रंगा
याच्या डोळ्यात झलक काही वेगळी, पहा
याची थैथैती नाचती जवानी पहा ॥१॥
ज्ञान-प्रकाश हा जगती फिरणारा
अज्ञान अंधकार समूळ नाशणारा
याच्या तेजात संस्कृती हसती पहा
याची थैथैती नाचती जवानी पहा ॥२॥
शोभतो सदा हा प्रभू-विश्वासाने
शक्तीची लगाम हले ईश्वर- हाताने
याची शक्ती सुगंधी भक्ती पहा
याची थैथैती नाचती जवानी पहा ॥३॥
प्रेरणा नि प्रेम पांडुरंगी मिळाले
योगेश्वर आशीष त्याला त्याने लाभले
आता उगवे उषा, रात्र सरली पहा
याची थैथैती नाचती जवानी पहा ॥४॥