भावगंगा - संतांच्या त्या पवित्र चरणी

संतांच्या त्या पवित्र चरणी
देह असो माझा देवा
परीस होउनि पवित्र करिती
अमोल दाखविती ठेवा ॥धृ॥
मजजवळी तो सदाच असुनी
दूर जातसे लुप्त होउनी
दिव्यदृष्टि मजला देउनिया
अमोल दाखविला ठेवा ॥१॥
अमोल ठेवा प्रगट हा नसे
विषयभ्रमाने वेढिला असे
प्रभु तव नामे नष्ट होतसे
अज्ञानाचा हा कावा ॥२॥
स्वाध्यायाने तव भक्तीने
विश्वबन्धुता ती हृदयाने
विश्वाचे नंदनवन प्रेमे
होईल हा मज वर द्यावा ॥३॥