भावगंगा - हसत रहा रे

हसत रहा रे हसत रहा
प्रेम प्रभूचे पहा जरा
भाग्याने जे तुला लाभले
प्रभू प्रीतीचा तोच झरा ॥धृ॥
शोध प्रीती निर्व्याज सुखामधिं
घडवी जीवन तू दु:खामधिं
सुखात प्रभुला टाकु नको तू
दु:खात धरी रे धीर जरा ॥१॥
सदा नांदवी प्रीती विषमता
दोष प्रभूला कसला देता
समजावी सुख-दु:ख ऐक्यता
भाव दृष्टिमधली मधुरा ॥२॥
सुखात स्नेहा येते भरती
दुखात भावामधि विश्रान्ती
भाव भोग सुख-दु:खे देती
तो प्रसाद प्रभुचा मान पुरा ॥३॥
विपुल सुखामधि उणे न काही
उपास म्हणावा येता ‘नाही’
मागावे, मिळते प्रअभुकृपा ही
जाण त्यातले मर्म जरा ॥४॥
कसले बघसी काय वाढले
दृष्टिदोष ते फेक सानुले
देणारावर प्रेम कर भले
समाधान त्यातच चतुरा ॥५॥