भावगंगा - निघाले दादांचे यात्रिक

देव मस्तकी घेऊन करुया
जीवन हे सार्थक निघाले दादांचे यात्रिक ॥धृ॥
तीर्थस्थाने गढूळ झाली,
मांगल्याची कृती न उरली
भावफुलांना हळुच फुलवुनी,
करिती जीवन हे सात्विक ॥१॥
मंत्र गिरविती कृतिभक्तीचा,
भाव-अंतरी शुद्ध भक्तीचा,
ठेवा द्याया ॠषी मुनींचा,
चालले प्रेरक हितचिंतक ॥२॥
भगवंताला शिरी घेऊनी
गीता नेती घराघरातुनी,
गंगा वाहे मनामनातुनी,
असे हे तेजस्वी साधक ॥३॥
घराघरातून भाव निमाला,
स्नेह-गोडवा मुळी न उरला,
नाते दैवी जोडुन उठला,
हरीचा प्रेमळ हा पाईक ॥४॥
अग्रदूत हे धर्मक्रान्तीचे
साधक दैवी युगायुगांचे,
वारस हे तर ॠषीमुनींचे,
जयांचे दादा उद्धारक ॥५॥